Jæja - langir og strangir vinnudagar að baki og loksins komin heim. Lærði helling á heimsókninni til Þjóðminjasafnsins og hef margar hugmyndir. Það bíður mín líka margt í vinnunni því við erum að setja upp sýningu fyrir fyrstu helgina í nóvember, svo ég var orðin óþreyjufull að komast heim og hefjast handa.

Við héldum að við hefðum fengið íbúð, þess vegna fram að jólum, en eigendur íbúðarinnar vilja víst ekki börn, svo við verðum að vera komin út fyrir 1. október. Helga systir reddaði málunum og Aron frændi kemur til bjargar. Við fáum hans íbúð og hann gistir hjá foreldrum sínum þegar hann er í landi. Gott að eiga góða að, ha?

Húsið gengur annars vel. Það er búið að undirbúa fyrir einangrun (þarf að leggja lista fyrst), það er líka búið að einangra þakið sem var vinna því lofthæðin er sums staðar fjórir metrar þar sem mest er. Nú getum við lagt plast yfir það og kallað á rafvirkja sem ætlar að hitta okkur í dag og ráðleggja okkur. Hann hefur sérstakan áhuga á húsinu því þetta er gamla ættaróðalið hans ;o)

Gluggarnir verða tilbúnir um miðjan október, reyndar ómálaðir, en koma þá og þá er hægt að klára að einangra veggina - við þurfum jú að breyta svo miklu á norður og suðurhlið hússins, þar sem nú er einn stór gluggi verða tveir líkt og í gamla daga þegar húsið var byggt. Þegar búið er að setja þá glugga í er hægt að klára að einangra alla efstu hæðina og þá er hægt að klára hana.

Svo þetta gengur .... þó hægt sé fyrir minn smekk ;o) Ég er náttla orðin ferlega þreytt á að búa svona tímabundið alls staðar, alltaf hálfvegis í töskum, týnandi hlutum endalaust eða ekki að finna þá akkúrat þegar ég þarf á þeim að halda og alltaf drasl hjá okkur útaf þrengslum. En þessu fer að ljúka. Og Nína kemur eftir 12 daga!!!!!

Bráðum fer að myndast rútína hjá okkur og allir sameinaðir á ný :o)